« Quittance donnée par Blanche de Navarre à Charles VI, roi de France, de la nouvelle assiette de son douaire. »
Identification du témoin
-
Quittance
FranceParisArchives NationalesJ//475, n° 88Original
Sceau
-
non
Analyses
-
Quittance donnée par Blanche de Navarre à Jean II, roi de France, de la nouvelle assiette de son douaire. 26 mars 1396, n. st.
Texte
-
Blanche par la grace de Dieu royne de France. A tous ceuls qui ces lettres verront salut. Comme nous aions nagair supplié et requis au roy nostre trés cher filz que de la prisee de la terre que nous tenons a Pontoise et en Normandie pour onze mil cinq cens soixante dix huit livres pour partie de nostre douaire, et pour deux mil livres a heritage que nous prenions au tresor, laquelle prisee se devoit faire par l'estimacion et valeur de dix annees precedens et continuees avant le dit bail, ce qui n'a pas esté fait, il lui pleust se tenir a content sans autre inquisicion ou prisee faire du temps avenir, ce qu'il nous a octroié de sa grace et quitté absolument de tout ce qui nous en pourroit estre demandé pour le temps passé et de cy en avant. Parmi ce que nous le devons quitter, du moins se moins y avoir et lui en donner nos lettres de quittance, si comme plus a plain est contenu es lettres du roy nostre dit filz, desquelles la teneur s'ensuit : Charles par la grace de Dieu roy de France. A tous ceuls qui ces lettres verront salut. Comme la terre que tient a present nostre tres chere dame et mere la royne Blanche a Pontoise et en Normandie lui eust esté baillee par nostre trés cher seigneur et pere, que Dieu absoille, pour la somme de treize mil cinq cens soixante dix huit livres tournois, c'est assavoir pour partie de son douaire, onze mil cinq cens soixante dix livres, et pour deux mil livres a heritage que elle prenoit au trezor par telle condicion que la dicte prisee s'en feroit par l'estimacion et valeur de dix annees precedens, et se plus valoit, l'outre plus nous demourroit et le moins lui seroit parfait, si comme par les lettres de nostre dit seigneur puet apparoir. Et pour ycelle estimacion faire, plusieurs poursuites aient esté faictes, maiz neantmoins soit demourée a faire pour la grant longueur qui y eust esté et pourroit estre, et mesmement que elle n'a pas tenu ne tient entierement toute ycelle terre en la maniere et si comme nostre dit seigneur la tenoit lors que il lui bailla, tant plusieurs exempcions qui y sont le ressort de la conté de Eu et d'autres terres et aussi la ville et chastel de Gisors, comme plusieurs autres choses qui furent reservees, et aussi a depuis gouverné au mieulx et le plus prouffitablement que elle a peu tant pour nous comme pour elle. Maiz la dicte terre ne lui a pas valu par an tant d'assés que la somme dessus dicte monte, si comme il appert clerement par les comptes de ses receveurs, l'espace de trente six ans qu'il a qu'elle vint a tenir la dicte terre. Si comme nostre dicte dame nous a elle mesmes dit, a exposé en sa personne en nous suppliant humblement que comme elle soit sur la fin de son aage, lui voulsissions pourveoir a la seurté d'elle avant son trespassement, afin que en l'excecution de son testament et ordenance de ses biens ne lui feust donné aucun empeschement ou temps avenir a cause de la dicte prisee et estimacion non faitte comme dit est. Savoir faisons que considerees les choses dessus dictes et pour la bonne et vraye amour que nostre dicte dame a tousjours eue envers nous, eu sur tout bonne et meure deliberacion en nostre grant conseil, nous, de certaine science, auctorité royal et grace especial, nous tenons pour contens de la prisee et estimacion d'icelle terre, jassoit ce que faicte n'ait esté, et voulons qu'elle la tiengne et en joisse sa vie durant pour la dicte somme de treize mil cinq cens soixante dix huit livres tournois par an, sans ce que aucune inquisicion ou prisee en soit faicte ou temps avenir, et quittons plainement et absolument nostre dicte dame par ces presentes de tout ce qui lui en pourroit estre demandé en quelque maniere que ce soit pour le temps passé et de cy en avant ou a ses excecuteurs ou aians cause aprez sa mort, ne que pour ce aucun arrest ou empeschement lui soit mis en ses biens ne ou fait de son excecucion, parmi ce que elle nous a quitté aussi, du moins se moint y avoit. Et de ce nous fera lettres de quittance. Si donnons en mandement par ces lettres, a nos amés et feaulx gens de nos comptes et tresoriers a Paris presens et a venir, que nostre dicte dame facent et laissent joir et user paisiblement de nostre dicte grace et quittance, et contre la teneur d'icelle ne l'empeschent elle, ses excecuteurs ne aucuns de ses biens ores ne aprez sa mort en quelque maniere que ce soit. En tesmoing de ce, nous avons fait mettre nostre seel a ces presentes. Donné à Paris le XIIIIe jour de mars l'an de grace Mil CCC IIIIxx et quinze, et de nostre regne le XVIe. Ainsi signé par le roy en son conseil ouquel mes seigneurs les ducs de Berry, de Bourgongne, d'Orleans et de Bourbonnais, le sire d'Elebret, vous Lamiral, messire Amaurry d'Orgemont et autre est Neauville. Savoir faisons que moiennant ladicte grace a nous faicte par le roy nostre dit filz, nous nous tenons a contente de lui ladicte prisee jassoit ce que faicte n'ait, et d'icelle prisee le quittons par ces presentes. En tesmoing de ce nous avons fait mettre nostre seel a ces presentes lettres. Donné a Neaufle le XXVIe jour de Mars l'an de grace Mil CCC IIIIxx et quinze. Par la royne, J. Menart.
-
Blanche de Navarre, reine de France
Charles VI, roi de France
Charles V, roi de France
Jean de France, duc de Berry
Philippe dit le Hardi, duc de Bourgogne
Louis, duc d'Orléans
Louis, duc de Bourbon
Sire d'Albret
Amaury d'Orgemont -
Gisors
Normandie
Pontoise
France
Eu
Berry
Bourgogne
Orléans
Bourbon
Orgemont
Neaufles
Paris
Neauville
Bibliographie
-
Jean-Marc Cazilhac, Jeanne d'Évreux, Blanche de Navarre : Deux reines de France, deux douairières durant la Guerre de Cent ans, Paris, ed. L'Harmattan, 2011, p. 177.
María Narbona Cárceles, « La "Discreción hermosa" : Blanca de Navarra, reina de Francia (1331?-1398). Una dama al servicio de su linaje », dans Martin Aurell (dir.), La Dama en la corte bajomedieval, 2001, p. 77-118.
Brigitte Buettner, « Le système des objets dans le testament de Blanche de Navarre », Clio : Femmes, Genre, Histoire, vol. 19 « Femmes et images », 2004.
Léopold Delisle, Testament de Blanche de Navarre, reine de France, Paris, 1885, p. 1-64.
Marguerite Keane, Material Culture and Queeship in 14th-century France : The Testament of Blanche of Navarre (1331-1398), Leiden, ed. Brill, 2016
Informations
Acte
Audrey
Chambard
(Université Sorbonne Paris Nord), dans
Actes des femmes de pouvoir
label.quote.actes-des-femmes-de-pouvoir