« aposcripta-95 »

Dilecto filio nobili viro Hugoni de Rupe, militi, rectori Comitatus Venayssini, salutem, etc. Inter ceteras terras et provincias nobis et Ecclesie romane immediate subjectas comitatum Venayssini paternis affectibus velut nostre recreationis pomerium intuemur, desideriis optantes intensis ipsum sic preservari ab incursibus malignorum et in eo sic vigere continue cultum justitie, fidelitatis et pacis quod habitatores et incole comitatus ejusdem in pacis ejusdem pulcritudine sedeant, fiducie tabernaculum habitent, et requie opulenta quiescant. Intendentes igitur ad horum promotionem et observationem deputare personam juxta cor nostrum ydoneam, et ad te, per cujus fidelem et circumspectam industriam posse confidimus in hac parte satisfieri votis nostris, nostre considerationis aciem dirigentes, te generalem rectorem ejusdem comitatus ipsiusque districtus et pertinentiarum usque ad nostrum et apostolice Sedis beneplacitum in temporalibus deputamus, et volumus quod juridictionem spiritualem, que in fulcimentum temporalis dumtaxat exerceri per rectores ejusdem comitatus consuevit, ibidem facias per personam ydoneam ecclesiasticam a te super hoc deputandam in fulcimentum hujusmodi tantummodo, cum necesse fuerit, exerceri, disponendi, ordinandi, statuendi, precipiendi, mandandi, et alia omnia et singula faciendi, gerendi et exequendi plenarie, alienatione tamen bonorum ejusdem comitatus tibi penitus interdicta, que ad officium rectorie hujusmodi pertinere noscuntur, contra rectores quoslibet et rebelles, quotiens expedierit, temporaliter per te ac spiritualiter per eamdem personam ecclesiasticam appellatione postposita compescendi facultatem tibi plenam et liberam concedentes. Quocirca nobilitati tue per apostolica scripta mandamus quatinus onus rectorie hujusmodi reverenter et devote suscipiens, sic fideliter et utiliter rectoriam ipsam studeas exercere quod per tuam solertem et providam diligentiam nobis et Ecclesie romane predicte necnon dicto comitatui ejusque habitatoribus et incolis sperata commoda proveniant, tuque nostram et apostolice Sedis gratiam valeas uberius promereri. Nos enim processus et sententias sive penas quas rite per te temporaliter et per dictam personam spiritualiter feceris, tuleris seu statueris in rebelles, ratos habebimus et faciemus auctore Domino usque ad satisfactionem condignam inviolabiliter observari, non obstantibus quibuscumque privilegiis, indulgentiis et litteris apostolicis generalibus vel specialibus quibusvis personis, cujuscumque status, gradus vel conditionis existant, ac communitatibus, universitatibus et locis ab eadem Sede concessis per que tue ac persone predicte jurisdictionis executio posset quomodolibet imperdiri, et de quibus quorumque totis tenoribus de verbo ad verbum habenda sit in nostris litteris mentio specialis. Datum apud Villamnovam, Avinionensis dyocesis, IIIJ idus septembris, anno tertioa.