« aposcripta-94 »

Venerabili fratri Johanni, episcopo Exoniensi. Displicibilis conquestio dilecti filii nostri Ademari, tituli Sancte Anastasie presbiteri cardinalis, nostri apostolatus auditui patefecit quod tu procuratores suos ymo cardinalem eumdem quominus fructus, redditus, et proventus ecclesie de Ayemynstre, tue dyocesis, annexe duabus prebendis ecclesie Eboracensis, quarum unam ipse obtinere noscitur, prout ad eum pertinet, percipere valeat et habere impedis contra justitiam et molestas. Cum autem impedimentum hujusmodi non solum in ejusdem cardinalis, cui saltem super suis juribus conservandis deferre ob Sedis apostolice, cujus honorabile membrum existit, reverentiam et sui status excellentiam tenebaris, sed in ipsius Sedis contemptum et contumeliam cedere dignoscatur, fraternitatem tuam rogamus attentius et hortamur quatinus, ab impedimento predicto desistens fructus, redditus et proventus ecclesie predicte per ipsum cardinalem et procuratores suosa predictos percipi et haberi permittas pacifice, sicut predecessores ejusdem cardinalis in eadem prebenda habuerunt et perceperunt per tempora de quibus memoria in contrarium non existit, sic te super hiis habiturus quod inde possis apud Sedem prefatam commendari potius quam merito reprehendi, dictumque cardinalem super tuis oportunitatibus tibi propitium constituas et benignum. Datum apud Villamnovam, Avinionensis dyocesis, IIJ ydus septembris, anno tertiob.