Général
-
Clément VI (1342-1352)
-
Le roi d'Aragon Pierre IV le Cérémonieux
-
Kalendas julii, anno secundo
-
-
Villeneuve-lez-Avignon
-
Lettre, général (après 1198, littere cum filo canapis)
-
[Registre de la chancellerie apostolique] D’après JJ 270, fol. 219 et 235v, le ms. latin 6025, fol. 12 et 31v, et le registre Vatican 137, ep. 121, fol. 41v.
-
Étienne Baluze, Guillaume Mollat, Vitae paparum Avenionensium. Nouvelle édition revue d'après les manuscrits et complétée de notes critiques, Paris : Letouzey et Ané, 1914-1922, vol. 4, n. XCVI
-
Clementis papae VI responsoria1 ad superiorem epistolam regis Arragonum.
-
Clemens, episcopus, servus servorum Dei, carissimo in Christo filio Petro, regi Aragonum illustri, salutem et apostolicam benedictionem.
Regalis excellentie litteras, quas ad justificationem processuum et aliorum que per te, fili carissime, facta fuerunt hiis diebus preteritis contra carissimum in Christo filium nostrum Jacobum, regem Majoricarum illustrem, nostro apostolatui noviter destinasti, solita benignitate recepimus, et que continebantur in eis pleno collegimus intellectu.
Sane, fili dilectissime, quamvis premissa tam gestis diversis inter clare memorie reges Aragonum et Majoricarum olim habitis quam efficacium rationum eloquiis elegantibus justificare fortiter per illa que describuntur in predictis litteris videaris, pro parte tamen regis predicti excusationes et rationes allegantur que justificare videntur non parum e contrario factum suum. Verum quia rex ipse de domo et prosapia tua regia processisse noscitur, et tibi nexu sanguinis et affinitatis de propinquo non modicum, cum sororem tuam germanam in uxorem habeat, ex qua prolem utriusque sexus suscepit, proculdubio est conjunctus, si laudabilia progenitorum tuorum vestigia imitari, sicut te decet, curaveris, tuis convenire honoribus non videtur ut ad regis prefati suique primogeniti nepotis tui, qui ei de jure debet succedere, aspires exterminium quomodolibet vel intendas. Nam rex ipse nequiret sic confundi, te predictoque nepote tuo, ipsius regis primogenito, ac carissima in Christo filia nostra Constancia, regina Majoricarum illustri, germana tua, ipsiusque regis conjuge, remanentibus inconfusis.
Quocirca regalem tuam rogamus excellentiam attentius et per Dei misericordiam obsecramus quatinus hec et alia que regie considerationi possunt super hiis occurrere intra pectoris regii claustra revolvens, et considerans nichilominus diligenter quod postquam super cepto negotio contra regem eumdem honorem recepisti votivum, regius debet animus ad pacem et misericordiam inclinari, cum sacra teste scriptura firmetur clementia thronus regis, erga regem prefatum domumque suam, quam velut propriam ex premissis causis et multis aliis teneris prosequi gratiis ac favoribus opportunis, non solum justitia set etiam gratia velis uti. Porro quia didicimus ab experto quod dilectus filius noster Bernardus tituli Sancti Ciriaci in Termis presbiter cardinalis, apostolice Sedis nuntius, tui honoris et commodi fervidus zelator existit, ipsum ad te, fili amantissime, partesque illas propter premissa specialiter providimus destinandum.
Cujus monitis, consiliis et exhortationibus in hac parte salubribus sic benigne, clementer et pie, quesumus, adquiescas quod tali et tante tamque honorabili victorie clementia succedente, fama tui nominis et honoris exinde felicia per orbem incrementa suscipiat, et apud Deum, qui pios et misericordes sic diligit quod ipse pater misericordiarum eis misericordiam repromittit uberiorem, in presenti gratiam et in futuro beatitudinis gloriam consequaris.
Datum apud Villamnovam, Avinionensis dyocesis, kalendis julii, pontificatus nostri anno secundo.
Informations
Acte
aposcripta
admin
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 20099 (aposcripta-86), http://telma-chartes.irht.cnrs.fr/aposcripta/notice/20099 (mise à jour : 01/09/2020).