Général
-
Boniface VIII (1294-1303)
-
Le roi de France Philippe IV le Bel
-
VIII kalendas novembris, anno quarto
-
-
Rieti
-
Lettre, général (après 1198, littere cum filo canapis)
-
[Autre copie médiévale] F. FRANCE, Bibliothèque nationale de France, ms. latin 10919, fol. 29 [en ligne].
-
Étienne Baluze, Guillaume Mollat, Vitae paparum Avenionensium. Nouvelle édition revue d'après les manuscrits et complétée de notes critiques, Paris : Letouzey et Ané, 1914-1922, vol. 3, n. XXXVIII
-
Ad Philippum IV, regem Francorum, de episcopatu Tolosano collato in Petrum de Capella, episcopum Carcassonensem.
-
Bonifacius, episcopus, servus servorum Dei, carissimo in Christo filio Philippo, regi Francorum illustri, salutem et apostolicam benedictionem.
Si sollicita meditatione discutiat regalis prudentie magnitudo, gratum et acceptum non modicum regi regum obsequium exhibetur et meritorum plerumque retributione multiplici fore dinoscitur apud eum pro minimis grandia largientem, si ob ipsius reverentiam ecclesiarum prelati, qui divina ministeria prosecuntur et gregis dominici curam gerunt, condignis pertractentur honoribus, favoribus fove[a]ntur uberibus, et oportunis auxiliis fulciantur, cum tanto commodius et efficacius officia sibi commissa exerceant quo illos suffragio muniri contigerit ampliori. Ecclesia siquidem Tholosana per obitum bone memorie Arnaldi, Tholosani episcopi, qui nuper apud Urbem veterem debitum nature persolvit, solatio destituta pastoris, nos gerentes ad eamdem ecclesiam specialis dilectionis affectum, eamque plenis favoribus confoventes, ac intendentes eidem de persona juxta cor nostrum ydonea providere, predictam ecclesiam a die quo vacasse dinoscitur ordinationi et provisioni apostolice Sedis et nostre, ea vice, auctoritate apostolica, duximus reservandam, decernentes ex tunc irritum et inane si secus de prefata ecclesia contra hujusmodi reservationis nostre tenorem, scienter vel ignoranter, a quoquam contingeret attemptari, et tandem ad personam venerabilis fratris nostri Petri, episcopi Tholosani, cujus grandia probitatis merita, experte prudentie magnitudo ac aliarum virtutum insignia nobis incognita non existunt, quemque ad ipsius ecclesie Tholosane regimen credimus et speramus fore perutilem et multipliciter fructuosum, nostre mentis oculos duximus convertendos. Ideoque intendentes, patris more solliciti, ecclesie prelibate profectibus ejusque statui utiliter providere, eumdem Petrum, dudum Carcassonensem episcopum, a vinculo quo ecclesie Carcassonensi tenebatur astrictus absolvimus, ipsumque ad eamdem Tholosanam ecclesiam transferentes, ipsi ecclesie, de fratrum nostrorum consilio et apostolice plenitudine potestatis, in episcopum prefecimus et pastorem, curam et administrationem ipsius sibi in spiritualibus et temporalibus committendo, eique plenam et liberam exhibendo licentiam ad prefatam Tholosanam ecclesiam transeundi ; firma concepta fiducia speque nobis indubia suggerente, quod eidem Tholosane ecclesie per ipsius Petri oculate circumspectionis industriam, suumque ministerium studiosum, divina favente clementia, votiva prosperitatis incrementa provenient, et honoris multiplicis cumulus producetur.
Quocirca serenitatem regiam rogandam attente duximus et hortandam quatinus eumdem episcopum, quem ob suorum exigentiam meritorum benivolentia prosequimur speciali, et commissam sibi ecclesiam habens pro nostra et apostolice Sedis reverentia propensius commendatos, sic te illi benignum exhibeas, sic favorabilem largiaris, ipsum et eamdem ecclesiam regalis benivolentie gratia prosequendo, quod idem episcopus, tuis presidiis circumfultus, commissum sibi regimen facilius et efficacius, cooperante Domino, prosequatur, nosque proinde magnitudinem regiam dignis in Domino laudibus attollamus.
Datum Reate, VIII kalendas novembris, pontificatus nostri anno quarto. -
Elizabeth A. R. Brown, « Guillaume de Nogaret et les textes : les registres JJ28 et JJ29 (BnF, lat. 10919) », dans La royauté capétienne et le Midi au temps de Guillaume de Nogaret. Actes du colloque des 29 et 30 novembre 2013, dir. Bernard Moreau, Julien Théry-Astruc, Nîmes : Éditions de la Fenestrelle, 2015, p. 209-242.
Informations
Acte
aposcripta
admin
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 20076 (aposcripta-63), http://telma-chartes.irht.cnrs.fr/aposcripta/notice/20076 (mise à jour : 14/12/2020).