Général
-
Clément V (1305-1314)
-
Tous les vassaux de l'église d'Agen
-
V kalendas martii, anno primo.
-
-
Lyon
-
Mandement (littere cum filo canapis)
-
[Expédition] E. Ex archivo archiepiscopi Narbonensis, Bal.
-
[Registre de la chancellerie apostolique] R. Reg. Vat. 52, fol. 151v.
-
Étienne Baluze, Guillaume Mollat, Vitae paparum Avenionensium. Nouvelle édition revue d'après les manuscrits et complétée de notes critiques, Paris : Letouzey et Ané, 1914-1922, vol. 3, n. XXIII
-
Clementis V epistola ad vassallos Ecclesiae Agennensis qua significat Bernardum de Fargis a se factum esse episcopum Agennensem [Baluze]. Clément [V] annonce aux vassaux de l'Eglise d'Agen qu'il a nommé évêque du lieu Bernard de Farges [APO].
-
Clemens episcopus, servus servorum Dei, dilectis filiis universis vassallis ecclesie Agennensis salutem et apostolicam benedictionem.
Superne dispositionis arbitrio ad summi apostolatus apicem, quamquam insufficientibus meritis, evocati, debitum inde nobis incumbens circa curam omnium ecclesiarum utiliter exolvere, auxiliante Domino, cupientes, solliciti corde reddimur atque vigiles ut de ipsarum ecclesiarum regiminibus committendis, quantum nobis ex illo permittitur cujus vices in terris gerimus, tales eis in pastores preficere studeamus de quibus, consideratis virtutibus desuper sibi traditis, presumere possimus verisimiliter et tenere quod creditas ipsis animas scientie verbo instruere valeant pariter et exemplo, ac ex eorum studio loca que sue fuerint deputata custodie grata suscipere debeant incrementa.
Nuper siquidem venerabili fratre nostro Bertrando, nunc Lingonensi, tunc Agennensi episcopo, de Agennensi ecclesia, cujus regimini presidebat, per nos ad Lingonensem ecclesiam, tunc vacantem, apostolica auctoritate translato, nos gerentes circa prefatam Agennensem ecclesiam sincere dilectionis affectum, et de ipsius ordinatione celeri, ne prolixe vacationis exposita remaneret incom[m]odis, attentius cogitantes, et volentes sibi de persona juxta cor nostrum ydonea providere, vigili super hoc adhibita diligentia, in dilectum filium Bernardum, electum Agennensem, archidiaconum Belvacensem, virum utique litterarum scientia preditum, morum honestate conspicuum, consilii circumspectione maturum, et aliis virtutum donis a Deo multipliciter edotatum, quorum nos reddit longa experientia non ignaros, mentis nostre aciem duximus convertendam. Proinde igitur tam gregi dominico quam ecclesie Agennensi predicte intendentes salubriter providere, de fratrum nostrorum consilio et apostolice plenitudine potestatis, eumdem Bernardum electum ipsi ecclesie Agennensi prefecimus in episcopum et pastorem, sperantes in illo qui dat gratias et premia largitur quod ecclesia Agennensis predicta, per ipsius electi circumspectionis industriam, preservabitur a noxiis ac spiritualiter et temporaliter, auctore Domino, felicibus proficiet incrementis.
Quocirca universitati vestre per apostolica scripta mandamus quatinus, eumdem electum devote recipientes et honeste tractantes, ejus salubribus mandatis et monitis intendatis et, prestantes sibi vel ejus procuratori suo nomine fidelitatis solite juramentum, consueta exhibere servitia et de juribus ac redditibus sibi debitis respondere curetis eidem, ita quod ipse in vobis filios devotionis invenisse letetur, vosque in eo patrem habeatis benivolum et assidue gratiosum. Alioquin sententiam sive penam quam ipse vel dictus vicarius spiritualiter vel temporaliter rite tulerit in rebelles ratam habebimus et faciemus, auctore Domino, usque ad satisfactionem condignam inviolabiliter observari.
Datum apud Sanctum Cyricum prope Lugdunum, V kalendas martii, pontificatus nostri anno primo.
Informations
Acte
aposcripta
admin
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 20067 (aposcripta-54), http://telma-chartes.irht.cnrs.fr/aposcripta/notice/20067 (mise à jour : 26/02/2020).